قژی نەرمت
قژی نەرمت ، وەکو تاڵی خۆرەتاو
لەسەر قۆڵۆ شانی سپی ، پەرشوخاو
نەغمەی شیرین ، ئاوازی خۆش لە دەنگا
ورشەی سەرنج ، لەناو چاوێکی مەنگا
خاڵێکی کاڵ ، نەخشێکی جوان ، لەسەر ڕوو
بەژن و باڵات ، وردیلە و ڕێک و هەڵچوو
زەردەخەنەی ئەو ڕووە ، هی ئەو لێوە
فریشتەی هەست ، هی ئەم دڵە بزێوە
وای لێ ئەکات ، بێتە سەما و گۆرانی
بلەرزێنێ تەلی ئاوازی جوانی
درەختەکەی ، سەر کانێکەی باخی چەم
پێ ئەکەنێ ، گەڵی ئەڵێن : پڕ بەدەم
لە بیرمانە ، مناڵ بوون لەو باخا
زەردەی دەمتان ، ئەدا بەپشتی داخا
تۆ بڕوانە ئەو کانییە نازدارە
ئێستەش وێنەی هەردوکمانی لێ دیارە
تۆم خۆش ئەوێ بەڵام نابم بە یەخسیر
لە تاوی قژ ، بۆ دڵم بکەی زنجیر
نە شوانم بە ، نەشوانیت بم بە شـمشاڵ
بۆ دڵێکی وشک بکەین ، پەڕوباڵ
نە کوڕنوشت بۆ ئەبەم ، نە تۆش بۆ من
با لەباخی شادیا ، دەست لە گەردن
دوو دڵداربین ، بەڕاستی دوو فریشتە
ئەو ژیانە بەو جۆرە بێت بە‌هەشتە
لە گوڵی یاد ، لە یادی جوانی ڕەنگین
پێشکەشت بێت چەپکێک گوڵاڵەی شیریا
لەبیرت کەم
سا چۆن دەبێ لەبیرت کەم؟چۆن بۆم دەکرێ دڵگیرت کەم؟
....
هێشتا قاقای پێکەنینت ،
چرپە و سکاڵای شیرینت ،
لەبەر گوێم دەزرینگێنەوە ،
هەروا دێن و نابڕێنەوە .
سا چۆن دەبێ لەبیرت کەم؟
چۆن بۆم دەکرێ دڵگیرت کەم؟
......
هێشتا بزەی سەر لێوەکەت ،
هێشتا دڵکێشیی شێوەکەت ،
هێشتا کوڵمی خوێنتێزراوت ،
ئاخافتنی گۆشەی چاوت ،
وەک تارمایی لەبەر چاون ،
نەخشی سەر دڵی داماون ،
سا چۆن دەبێ لەبیرت کەم ؟
چۆن بۆم دەکرێ دڵگیرت کەم
دڵ
"ئەوە دڵم نییە کە لێ دەداتدەنگی دووری و نزیکی
هەنگاوەکانی تۆیە،
چاویشم کە لێڵ دەبێ
هەر بە دیتنی تۆیە
بینا دەبێتەوە،
خۆزگە دەمزانی لە کوێیت
بۆ ئەوەی هەنگاوەکانم
هێزی بگرتایە".
